Т.Баярхүү: Зүй бусаар хорогдсон малын сэг зэмийг устгах бэлтгэл хангагдаж байна

УОК-оос зудын нөхцөл байдлын талаар өдөр бүр мэдээлэл өгч буй. Энэ үеэр шар усны үер болон зүй бусаар хорогдсон малын сэг зэмийг устгал ажлыг хэрхэн зохион байгуулах талаар танилцууллаа.

Комиссын нарийн бичгийн дарга Т.Баярхүү “УОК-оос шар усны үерээс урьдчилан сэргийлэх чиглэлээр шат, шатны онцгой комисст албан даалгаврууд хүргэгдсэн.

Тухайлбал Улаанбаатар хотод тодорхой голуудын ай савын мөсийг цэвэрлэх ажлууд хийгдэж байна. Энэ ажил орон нутагт мөн хийгдэж байна.

Гамшгийн эрсдэлээс урьдчилан сэргийлэх үйл ажиллагаанд олон нийтийн оролцоо чухал.

Иргэд, ААН, байгууллага шат, шатны онцгой комиссоос зохион байгуулж байгаа үйл ажиллагаанд идэвхтэй оролцож байж, гамшгийн эрсдэлийг бууруулж чадна” гэв.

Зудад үрэгдсэн малын махыг хэрхэн устгаж байгаа бол? гэсэн асуултад “Жил бүрийн өвөл, хаврын улиралд тодорхой хэмжээний мал зүй бусаар хорогддог.

Цас ханзарч, малын сэг зэм цасан доороос гарах үед цуглуулж, устгах, булшлах ажлууд хийгддэг. Хуулиараа малын сэг зэмийг устгах ажлыг Мал Эмнэлгийн Ерөнхий Газар удирдан зохион байгуулж, аймаг, орон нутгийн Засаг дарга нар хариуцдаг. Энэ чиглэлээр бүх шатны байгууллагад үүрэг, чиглэл өгөгдсөн, малын сэг зэмийг устгах бэлтгэл ажил хангагдаж байгаа.

Одоогийн байдлаар малын зүй бус хорогдол зогсоогүй, хүнд цаг үе үргэлжилж байна” хэмээн хариуллаа.