Д.Тогтохсүрэн: Тэтгэврийн хэмжээг 100 мянган төгрөгөөр нэмэх нь зөв гэж үзэж байгаа

УИХ дахь МАН-ын бүлгийн өнөөдрийн хуралдаанаар хэлэлцсэн асуудал болон гаргасан шийдвэрээ танилцуулав.

МАН-ын бүлгийн дарга Д.Тогтохсүрэн “Тэтгэврийн хэмжээг 100 мянган төгрөгөөр нэмэгдүүлэх, эх үүсвэрийг судлах ажлын хэсэг байгуулах шийдвэр гаргасан.

Эрүүгийн хуулийн нэмэлт өөрчлөлтийг яаралтай горимоор УИХ-д өргөн барьсан. Хуулиар насанд хүрээгүй хүчиндэх гэмт хэрэг, авлига, хүнийг санаатайгаар хөнөөсөн гэмт хэргийн ялын бодлогыг чангатгаж байгаа. Энэ асуудлыг хэлэлцлээ” гэв.

Тэрбээр сэтгүүлчийн асуултад “Засгийн газраас улсын төсөвт 2024 оны дөрөвдүгээр сарын 1-нээс тэтгэврийг 10%-аар нэмэгдүүлэхээр тусгасан.

Манай улсын нийт тэтгэвэр авагчдын 70 орчим хувь нь бага тэтгэвэр авч байгаа. Тиймээс эдгээр иргэдийн тэтгэвэр хэт бага байна гэж үзсэн. Өнгөрсөн жил тэтгэврийн зөрүүг арилгаж, нэмэгдүүлсэн ч бага тэтгэвэр авагчдынх 50,000 төгрөгөөр нэмэгдсэн.

Инфляцтай холбогдуулаад нийт тэтгэвэр авагчдын хэмжээг 100,000 төгрөгөөр нэмэх нь зөв гэж үзэж байгаа” хэмээн хариуллаа.