![](https://timelive.mn/wp-content/uploads/2023/11/qw.jpg)
Засгийн газрын ээлжит хуралдаанаас гаргасан шийдвэрийг танилцуулах үеэр Засгийн Газрын Хэрэг Эрхлэх Газар(ЗГХЭГ)-ын дарга Д.Амарбаясгалан шатахууны нийлүүлэлтийн талаар мэдээлэл өгөв.
ЗГХЭГ-ын дарга, сайд Д.Амарбаясгалан “Шатахуунтай холбоотой бодитой, үнэн зөв тайлбар өгөх нь зүйтэй болов уу.
Өмнөх жилүүдэд дизель түлшний хэрэглээний хэмжээ энэ жилийнхээс 1.5 дахин бага байжээ. Яагаад гэвэл КОВИД-19-ийн дараа эдийн засаг сэргэсэн байна. Үүнтэй холбоотойгоор уул уурхай, аж ахуйн нэгжийн үйл ажиллагаа өндөр хэмжээнд сэргэсэн.
ОХУ-аас захиалсан дизель түлшний ханган нийлүүлэлт нь өнөөдрийн эрэлтэд хүрэхгүй болсон шалтгаан сүүлийн саруудад бий болоод буй.
Үүнд Уул Уурхай, Хүнд Үйлдвэрийн Яамнаас зохицуулалт хийхээр шуурхай ажиллаж байна. Арванхоёрдугаар сард ОХУ-аас дизелийн түлш орж ирдэг хэмжээгээрээ орж ирэх хүлээлтийг тавьж байна.
Нэг асуудал үүсдэг нь ОХУ-аас орж ирж байгаа дизель түлш нь ЕВРО-2 стандартынх. Харин Хятад улсаас орж ирж байгаа нь ЕВРО-5-ын дараагийн стандартын түлш орж ирэхээр болж байна.
Цаашдаа Монгол Улсын Засгийн газрын зүгээс нефтийн салбарыг аажмаар зах зээлийнх нь зарчимд нийцүүлэх бодлогыг тогтмол баримталж, импортлох бүс нутгийг дан ганц ОХУ гэлтгүй Хятад, Өмнөд Солонгос зэрэг улсаас нефтийн бүтээгдэхүүнийг олборлох боломжоо бүрдүүлнэ хэмээн зорьж байна” хэмээв.
Мөн “Газрын тосны үйлдвэрийг 2026 оны дөрөвдүгээр улиралд ашиглалтад оруулах төлөвлөгөөтэйгөөр эрчимтэй ажиллаж байна. Энэ үйл ажиллагаанд өнөөдөр ямар нэгэн саатал, доголдол үүсээгүй. Хөрөнгө оруулалт, бүтээн байгуулалтын ажил амжилттай явж байгаа.
Өнөөдөр дотоодод олборлож байгаа газрын тосны бүтээгдэхүүн хуваах гэрээнийхээ дагуу Монголын талд ногдож байгаа хувь нь газрын тосныхоо үйлдвэрийн хэрэглээг бүрэн хангадаг байх бодлогыг хэрэгжүүлэхээр зорьж буй.
Энэ агуулгаар БНХАУ-ын “Петрочайна”-гийн толгой компанитай хэлэлцээр хийх ажлын хэсгийг албан ёсоор байгуулсан. Өөрөөр хэлбэл 30 жилийн түүхэнд анх удаа хоёр талын хамтарсан ажлын хэсгийг байгуулах шийдвэрт хүрсэн” гэлээ.
0 cэтгэгдэлтэй