Х.Нямбаатар: ХҮН нам ер нь “Юу ч байсан эсэргүүцнэ“ гэсэн муйхар хандлагаар улстөрждөг боллоо

НИТХ-ын төлөөлөгч П.Наранбаяр “НИТХ хуралдаж, ердөө 2 сарын өмнө баталсан төсвөө тодотгон, 371 тэрбумаар нэмж, 3.2 их наяд болгох нь. Торгуулийн орлого гэхэд л 213 тэрбум гэж тооцжээ. Зарлага гэвэл боржин чулуугаар нийслэлийн явган замуудыг дахин солиход 45 тэрбумыг зарцуулах нь” гэх байр суурийг цахим хуудаснаа илэрхийлсэн.

Тэгвэл Хотын дарга Х.Нямбаатар хариу тайлбар хийжээ. Тэрбээр,

“Энэ ХҮН нам ер нь “Юу ч байсан эсэргүүцнэ” гэсэн муйхар хандлагаар улстөрждөг боллоо. Хальтирдаг хавтан асуудалтай байгааг бүгд мэдсээр байхад, албаар 10*10-ын шооны зураг тавьж, бусдыг төөрөгдүүлэх зорилгоор будилаантуулахаа болиорой. Нийслэл хот энэ өвөл 32-ын тойргоос 4-р дэлгүүрийн уулзвар хүртэл халтирдаггүй боржин чулуугаар явган хүний зам тавьсан.

Яг энэ жишгээр цаашид явган замыг халтирдаггүй болгоно. Энэ удаагийн төсвийн тодотголын гол зорилго бол УБ хотод метро барих гүйцэтгэлийн ажлын даалгавар, техникийн тодорхойлолт боловсруулах, хяналт тавих, зөвлөх үйлчилгээ үзүүлэх компанийг олон улсын нээлттэй тендерээр сонгон шалгаруулах ажил юм” гэжээ.