Б.Энхбаяр: Шүүх шинжилгээний байгууллага дүгнэлт хийж, гэмт хэргийн улмаас хохирогчийн сэтгэл санааны хохирлыг мөнгөн дүнгээр тооцож, барагдуулдаг болж байна

Хууль зүй, дотоод хэргийн сайд Б.Энхбаяр Шүүх шинжилгээний ерөнхий газарт өнөөдөр ажиллаж, орчин үеийн дэвшилтэт шинжилгээний лабораториудын үйл ажиллагаатай танилцан, алба хаагчидтай уулзлаа. Энэ үеэр тэрбээр,

“Нэгдүгээрт, Манай улс дэлхийд гарч байгаа хамгийн сүүлийн үеийн ямар ч төрлийн хар тамхийг энэ оноос эхлэн бүрэн илрүүлэх боломжтой болсон. Энэ лабораторт хамгийн сүүлийн үеийн хар тамхи болон бусад бодисуудыг маш богино хугацаанд илрүүлнэ.

Хоёрдугаарт, Кибер аюулгүй байдалтай холбоотойгоор дуу, дүрс эвлүүлэх, хиймэл оюун ухаанд суурилсан дуу дүрсний эвлүүлгүүдийг хийх зэрэг гэмт хэргүүд гарч байна. Тийм учраас дуу дүрсний хувьд эвлүүлэг мөн үү үгүй юу гэдэг дээр богино хугацаанд шинжлэн судалж, дүгнэлт гаргах чадвартай лаборатортой болсон гэдгийг хэлмээр байна. Мөн энэ төрлийн гэмт хэрэгтэн зугтах аргагүй болсон шүү гэдгийг тодотгож хэлье.

Гуравдугаарт, Хүний сэтгэцэд учирсан хохирлыг Монгол Улс түүхэндээ анх удаа мөнгөн дүнгээр тогтоодог болжээ. ШШБ тогтоодог болж эхлэж байна” гэлээ.

Шүүх шинжилгээ нь аливаа хэрэг, маргааныг хянан шийдвэрлэх ажиллагааны явцад хэрэгт авагдсан ул мөр, эд мөрийн баримтад үзлэг, шинжилгээ хийж шинжлэх ухааны үндэслэлтэй, хараат бусаар дүгнэлт гаргаж, хэрэг маргааныг шийдвэрлэхэд чухал үүрэг гүйцэтгэдэг салбар юм.

Шүүх шинжилгээний ерөнхий газар нь Бүгд Найрамдах Солонгос Улсын олон улсын стандартад нийцсэн, сүүлийн үеийн дэвшилтэд техник, технологи бүхий шинжилгээний лабораториудыг 2023 онд үйл ажиллагаандаа нэвтрүүлээд байна. Ингэснээр аливаа хэрэг маргааныг илүү нарийвчлалтай, шинжлэх ухааны үндсэн дээр цаг алдахгүй хянан шийдвэрлэх техник технологийн нөөц боломж нэмэгдэж байгаа юм. Өмнө нь манай улсад хийгдэх боломжгүй байсан ахуйн хэрэглээний хийн найрлага тодорхойлох, биологийн дээжээс этиль, метилийн спиртийг төрөл тус бүрээр нарийвчлан тогтоох зэрэг шинжилгээг хийх бүрэн боломжтой боллоо.