НҮБ-ын өдөр өнөөдөр тохиож байна

Жил бүрийн 10 дугаар сарын 24-нд Нэгдсэн Үндэстний Байгууллагын өдөр тохиодог бөгөөд НҮБ-ын дүрмийг 1945 оны энэ өдөр баталж, 1948 оноос хойш тэмдэглэж иржээ.

Тодруулбал НҮБ байгуулагдан Сан-Францискогийн энхийн гэрээг баталсан цагаас хойш Монгол улс 1946 онд элсэх өргөдлөө анх гаргаж байв. Тухайн үеийн өрнөдийн орнуудын эсэргүүцлийг давж  8 удаа өргөдөл гарган, 15 жилийн дараа 1961 онд гишүүн болсон юм. Мөн Монгол Улсын санаачилгаар НҮБ нь 1970-аад оныг “Бичигтэн болох 10 жил” хэмээн зарлаж байжээ. Түүнчлэн Монгол Улс нь НҮБ-ын цөмийн зэвсгийн эсрэг тэмцлийг тууштай дэмжиж, улсынхаа нутаг дэвсгэрийг Цөмийн зэвсэггүй бүс нутаг хэмээн зарлажээ. Өдгөө Монгол Улсад ардчиллыг бэхжүүлэх, хууль зүйн орчныг сайжруулах, хүний эрхийг хамгаалах, ядуурлыг бууруулах талаар НҮБ-ын төрөл бүрийн хөтөлбөр хэрэгжүүлж байна. Монгол Улсын Зэвсэгт хүчин НҮБ-ын энхийг сахиулах үйл ажиллагаанд 2002 оноос оролцож, өнгөрсөн хугацаанд 12 ажиллагаанд 20 мянга гаруй албан хаагчаа илгээн үүрэг гүйцэтгүүлж, НҮБ-ын энхийг сахиулах ажиллагаанд цэрэг илгээгч топ 24 дэх орон болсон аж.