Хан-Уул дүүрэгт улс, нийслэлийн төсвийн хөрөнгө оруулалтаар 20 сургууль, 14 цэцэрлэг шинээр баригдаж байна

Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч Л.Хосбаяр, Нийслэлийн Боловсролын газрын дарга Б.Амартүвшин нар Хан-Уул дүүргийн боловсролын байгууллагын удирдлагуудтай уулзлаа.

Уулзалтаар боловсролын чанарыг дээшлүүлж, тэгш хүртээмжийг нэмэгдүүлэх, боловсролын байгууллагад ажиллаж байгаа багш, ажилтан албан хаагчдын нийгмийн хангамжийг дээшлүүлж салбар дундын уялдаа холбоог сайжруулах чиглэлээр санал солилцов.

Тус дүүргийн хувьд ерөнхий боловсролын 63 сургуульд 61 мянга гаруй хүүхэд суралцдаг бол 141 цэцэрлэгт 29 мянган хүүхэд сургуулийн өмнө боловсрол эзэмшдэг. Улс, нийслэлийн төсвийн хөрөнгө оруулалтаар 20 сургууль, 14 цэцэрлэг шинээр баригдаж байгаа. Нийслэлээс хамран сургах тойргийн сургууль, цэцэрлэгийн хүртээмжийг нэмэгдүүлэх зорилтын хүрээнд боловсролын салбарт нэлээд хөрөнгө оруулалтыг хийсний үр дүнд дүүргийн ерөнхий боловсролын сургуулиуд хоёр ээлжээр хичээллэж байна.

Цаашид сургалтын чанарыг сайжруулж хүүхдийн нийгэм, сэтгэл зүй, танин мэдэхүйн хөгжлийг дэмжих, боловсрол эзэмшихэд тулгарч буй бэрхшээлийг арилгаж сурах тэгш боломж бүрдүүлэх, хувь хүний онцлогт нийцүүлэн сургалт, үйл ажиллагааг чанар, үр дүнтэй зохион байгуулах чиглэлд анхаарч зарим ажил арга хэмжээг хэрэгжүүлнэ гэдгийг нийслэлийн засаг даргын орлогч онцолсон.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс