“Төгрөг нуурын ордын хэргийг шалгаж байна, шуурхай илрүүлнэ”

Төгрөг нуурын ордыг хууль бусаар бусдад худалдсан гэх асуудлаар эрүүгийн хэрэг нээж, шалгаж буй талаар Нийслэлийн прокурорын газраас өнөөдөр /2025.04.24/ мэдээлэл өглөө.

Нийслэлийн прокурорын газрын Хэрэг бүртгэх, мөрдөн байцаах ажиллагаанд хяналт тавих I хэлтсийн дарга, ахлах прокурор Ц.Гансүлд, 2025 оны 4-р сарын 11-нд ЗГХЭГ-аас гэмт хэргийн талаарх мэдээлэл ирүүлсэн. Уг мэдээллийг АТГ, УЕПГ-т ирүүлсний дагуу 4-р сарын 17-ны өдөр АТГ-ын Мөрдөн шалгах хэлтсээс мөрдөгчийн тогтоолын дагуу хэрэг бүртгэлтийн хэрэг нээхээр ирүүлсэн. Уг тогтоолын дагуу Нийслэлийн прокурорын газраас хүлээн авч хянаад Эрүүгийн хуулийн тусгай ангийн:

• 22.1-д заасан албан тушаалын байдлаа урвуулан ашигласан байж болзошгүй,
• 22.10-д заасан үндэслэлгүйгээр хөрөнгөжсөн байж болзошгүй гэх үндэслэлээр хэрэг бүртгэлтийн хэрэг нээж, хамтарсан ажлын хэсэг байгуулан мөрдөн шалгаж байна.

Хэд хэдэн байгууллагын чиг үүрэгт хамаарах асуудлыг мөрдөн шалгах тохиолдолд хамтарсан ажлын хэсэг байгуулдаг. АТГ-ын Мөрдөн шалгах хэлтсээс хамтарсан ажлын хэсэг байгуулах санал ирүүлснийг НПГ-ын хэлтсийн даргын тогтоолын дагуу Цагдаа, АТГ-ын хамтарсан ажлын хэсэг байгуулан шалгаж байна.

Эрүүгийн хэргийг хянан шийдвэрлэх тухай хуульд зааснаар хэрэгт нотолбор цуглуулах, хавтаст хэрэгт цуглуулсан нотлох баримтуудад үндэслэн буруутай этгээдүүдийг яллагдагчаар татна. Өнөөдрийн байдлаар ямар нэг хүнийг яллагдагчаар татаагүй байна. Гэмт хэрэг үйлдсэн байж болзошгүй хүн, хуулийн этгээдийг мөрдөн шалгаж байна.

-ЗГХЭГ-ын дарга Н.Учрал энэ хэрэгт УИХ-ын гишүүн Х.Баттулгыг нэрлэн, буруутгасан мэдээлэл олон нийтэд өгсөн?
-Олон нийтийн мэдээллийн хэрэгслээр цацагдсан асуудлыг шалгаж байна. Хэрэг бүртгэлтийн явц, үр дүн, төлөвлөлтийн асуудал нууцлалтай. Тухайн хэрэгт тодорхой хүн, хуулийн этгээдийг нэрлэх боломжгүй байна.
Мөрдөн шалгах ажиллагаа явагдаж дууссаны дараа нотлох баримтад үндэслэн эрүүгийн хэрэг үүсгэж, яллагдагчаар татаж, холбогдох мэдээллийг өгөх боломжтой гэв.